DIE GEHEIMNISVOLLE SPRACHE DER URUREINWOHNER VON CALW
a schwäbischs Märchenvon Hellmut G. Haasis
S isch amol gwäa, vor ganz ganz langer Zeit. Des isch so lang her, dass schau lang nemme wohr isch. Ond außer miar woiß koiner davo, vielleicht no ihr, aber au bloß, wann-r uffbassat. Ond des wärr-e no lang ed glauba.
Lang vor ausrer Zeit send d Alemanne eigwandrat, älles negs wie Asilanta, weil-s em Norda nex mai z ässad gee hot. Vor dena hend d Remer hier gläbt, davor d Kelta, no friaher andre Velker, mo mr nia d Noma rauskriegt häbe.
Etzad wurd-s a räachde Kuglfuhr: schau vor da Neandertaler hand em Nagoldtal Urureiwohner gläbt, mr hot se dia echte auverfälschte Ururcalber ghoißa. Des sen bsondre Leit gwäa. I hau äwl wissa wella: Wie hand die Urureiwohner vo Calb gschwätzt? Dazu haun-e an Schbada braucht.
Zairschd haun-e da Boda omgraba, em Bett vo dr Nagold. I hau mr halt deegd: Vielleicht geit-s äbbas omasoscht. Des sait jo schau dr Noma: Na---, nagraba, do miaßd glei Gold komma. Etzad, was fend-e? an Topf Scherba mit häälenga Zoicha.
A gschicktr Gschdudierter vo Dibeng hod rausbroochd, dia Zoicha uff meina Scherba seie fascht gleich wia em Zwoischdromland bei Bagdad. Koi Wonder midda em schwäbischa Zwoistromland zwischa dr Nagold ond dr Enz.
Des oine Wort isch oifach gwäa: LALÜ. Nex äls LALÜ. Dafir isch-s ander Wort omso grauslicher worra. Manche hand-s ihr Läabdag ed räachd glärnad. D airschde Silb hod ghoißa KRIM. - Awa, deschd doch hopfaleicht.
No goht-s weiter: KRIMBIMM. Uffbassa, ed schdolpra. Weiter: KRIMBIMMHÄXL.
Etzad goht-s zua wia uffm Rheifall z Schaffhausa, uff oin Sitz rast mr saugfährlich na: KRIMBIMMHÄXLSCHLBRRRRRRRRRRRRRRRRRRRRRR.
Onda rutscht des deppade Wörtle bloß no so da Fluss na: KRIMBIMMHÄXLSCHLBRRRRRRRRRRRRRRRR- RRRRRRGÄGSDPFSCHMDHH.
Uffbassa, beim letschde H isch-s em alta Nagoldtal om Kopf ond Kraga ganga. Do damit hod mr älle aussortiera kenna: d Reigeschmeckte, d Zuagroiste (mit ond ohne Knoblauch), d Fremde, d Ausländer &endash; ond ganz schlemm &endash; die airschde Geelfiaßler. Dia hand om-s Verrecka des zwoite H ed rausbrocht. Wahrscheins ed wella, gell?
Trotzdem isch des em alda Calb a schees Läaba gwäa. Lerna hot mr nex miaßa. Dr Birgermoischdr hot äll Tag seim liaba Herrgettle vom Nagoldtal uff da Knui dankt, dass dia Schbrooch so oifach gwäan isch.
A Schulhaus hot mr ed baua miaßa, d Lehrer ond d Schialer hand äls Feria gheed, s ganz Johr. D Sitzonga vom Gmoindrat sand noch a baar Sekonda aus gwäa.
Wa widd-n au hendla mit dene zwoi Wörtle? Do lohnt sich jo ed amol, s Maul uffzmacha.
Aber ois Tags, do hod-s räachd gräagard. Zairschd a bissle gniesalat, no trepflt, griaslt, gschbreezt. Aber no &endash; no hod-s räachd gsoicht ond bronzt ond gschifft ond batscht. Bloß no an oizicher Wolkabruch, vo morgnads bis de oobnads ond glei d ganz Nacht dure.
Koi Wonder: nach ra Woch isch d Nagold rauskomma. D Urureiwohner hand ihre Hiddana verrammlat. En dr zwoite Woch send se schau uff-m Dach ghockad. En dr dritte uff-m Firscht, die hellschde uff-m Kamee, aber do isch halt a bissle eng worra.
Etzad wa dau? Han se deegd, räachd schwätza hand se jo ed kenna. Do dafir muaß mr wissa, wa dia zwoi Wörtle ghoißa hand.
LALÜ hot hoißa sodda: Morom om älles en dr Welt isch schau widdr d Bolizei vo Pforza ruffkomma, om s Rathaus noch gschdohlene Zigaretta z durchsuacha?
Ond des andre oausschprechliche Wort hot hoißa solla: I woiß nex. Oder, je nochdem, i mog nex, i dur nex, i sag nex. Moischdens: i koo nex.
Zmol guckt oiner s iberschwemmte Tal naa. Wa kommt do ruff? Vor lauter Fraid jubelt-r: LALÜ LALÜ LALÜ LALÜ LALÜ. Des hot etzad ghoißa:
Morom om älles en dr Welt kommt do so a graus Reddongsboot vo Pforza ruff?
Älle hand naaglotzd. Uff dr oine Seit vom Tal hand se mitgschriea: LALÜ LALÜ LALÜ LALÜ LALÜ. Ond uff dr andre Seit vom Tal hand se zruckgee: KRIMBIMMHÄXL-SCHLBRRRRRRRRRRRRRRRRRRRRRRGÄGSDPF-SCHMDHH. Ond äls wiederholt. S isch-n halt nex anders eigfalla, se hand jo ned mai kenna.
Etzadle guggat au ihr amol zu dem Boot na. Sapperlott, dr graischde Nacha dr Pforzamer Birgerschaft, den ruadrat se aubacha narrisch gega d Schtrom s Tal ruff. Henda schtoht dr Kommandant ond schreit: RUCK ZUCK, OIS ZWOI, AUF LOS, ED SCHLOOFA, RUUUDRA, RETTA, DE ANDRE RETTA, WURDS BALD.
Am Kirchturm duad-r sei Soile feschtmacha ond durch an Trichter rufa: Auf ihr Calber, miar want eich retta. Eischteiga. Ed scheniera. En Pforza kochat ausre Fraua schau Kartoffelschnitz ond Schbatza.
Aber die Calber hand nex vrschdanda. Isch des ed a Send?
Dr Kommandant hot sei Boot von Hitte zu Hitte gfahra und gschriea: Eischteiga, sooscht versaufat-r älle. Aber d Calber hand bloß d Kepf gschittlat ond gschria: KRIMM ....
Noch zwoi Schdond hot d Pforzamer Reddong uffgee ond ihr Boot d reißende Nagold naatreiba lau. Oiner &endash; i glaub, des wurd gau a Dichter gwäa sei &endash; der hot seine zwoi schwaaze Socka auszoga ond ama Seila mit ama Schtecka nuffdau uff Halbmascht. Älle hand a bissle heila miaßa.
En dr näckschda Nacht isch d Nagold nomol gschdiega. Älle hot-s von da Dächer rabutzt ond weggschwemmt.
So isch die sonderbare Schbrooch vo dr Urureiwohner vo Calb blitzsauber d Nagold nagschwomma. Aber zom Glick, onda en Pforza hod-s an grausa Recha gee. Do hod mr die ururalte Calber uffgfischt, aatricknad, uff Bettfläscha nogschnallt, noch drei Täg losgmacht ond wiederbelebt: mit gschmelzte Maultäscha ond Mooscht.
Do dawäaga said mr no haid, die Maulfaule vo da Pforzamer dädad vo dene grettete Calber Urureiwohner abschtamma. A räachda Schbrooch hand se älle no lerna miaßa, aber den Rickschtand hand se no emmer ed uffgholad, bis haid ed.
Aus isch gwäa mit dera scheene Schbrooch.
Aber halt, oi Wörtle isch ed onderganga, des goht fei nia onder: LALÜ LALÜ LALÜ.
(Polizeimütze aufsetzen, Martinshorn imitieren, Trillerpfeife)
2005